Terinspirasi dari kawanku yang menikah hari ini semoga diberikan keluarga yang sakinah mawaddah warahmah. ketika berkunjung kerumah pengantin perempuan ada adat gayo yang biasa disebut melengkan, ketika seorang sesepuh di desa itu memberikan sambutan kepada Pengantin yang baru datang dengan melengkan wah.. luar biasa walaupun saya adalah orang gayo tapi sangat banyak sekali kata dan kalimat yang tidak saya mengerti sama sekali karena bahasa dan kalimatnya sangat jarang digunakan dalam bahasa dan percakapan sehari hari. hehehe oleh kerna itu ketika pulang dari ku ambil notebook ku mulailah mencari di Mbah Google dan dapatlah seperti ini hehehe...
Assalamualaikum Wr Wb……
Bapak gecek kepala kampong “Tetunyung/kampong A” tengku guru rejeni kami daleng kolak seserenen kayu rubu pelongohen beserta sarak opat ni ama reje si timang berat sijuel murege si kami hormati.
Sudere-suderengku alang bertolong si berat berbantu beserta ama ine tetue ni kami si wajeb tetah si perlu tentu ton ni kami tedet tempat ni kami menye(bemenye) si kami pemuliei. Kaom moslemen kaom muslimat sikot patot si layak laku si ara i batang ruang si mubahagie. Orom-orom mulo kite munyawahen puji syokor ku Allah SWT si nge munosah limpahan(limpahen) rahmat orom kurniae ku kite terutama berupe kesehatan(kesehaten) orom kelapangan(kelapangen) sehinge kite depet morom i batang ruang ni wan keadaen sehat wal afiat delem(wan) rangka beguru ni “wen/ipak/anak/kumpu”, buah ate jantong rasa sibegeral(sibegerel) “Putra/Peteri” Gere lupen selawat orom salam kite sawahen kujonjongente Nabi besar Muhammad SAW beserta sehebet orom keluargae karna(kena) payah pedi nge rasol berjuang(bejuang) ari si gelap nge ipinahne kite kusiterang, ari tempat sikaret nge iyesotne kite kusilapang, ari arol sirenah hine nge itatangne kite kupematang siatas mulie.Salah satu dene itarengne ku kite membina keluarga sakinah berdasar akad nikah sah Insya Allah lang ni lo kase orom-orom kite saksenen.
Ama reje ….kami atas nama sokot besinte munatangen jejari sepoloh ku reje ampon ku Allah maaf kutuah bahgiente karna(kena) kami male munyawahen keber singket cerite selalu berupe cerak kire sara patah orom peri kire sara kalimah. Karna delah si gere bertulen, ipon si gere berbelide, terlebeh mien ken beber si gere berdeku, mongken kase iwan cerak sara patah orom peri si sara kalimah ni ara we si patot tar mulo nge kupuren, si layak kukiripe mera we muputer kukuen, ini gelah berejen ama reje mumaafne. Ereng ni daripada oya harapan(harapen) kami tiro ike ken pantase gelah kase berulo, ike ken lememe keta gelah bertona.
Selanjote atas wajeb tetah perlu tentu ni sokot besinte isien, kire ngele mungonol ni ama reje kuatan ni tete sirapat jalenne, nge mungonol ni ama reje kutoyoh ni si musupu sirapat semate, delempon beta ara we kadang si patot kuuken nge kami konolen kuduru, si berat matape ara we mudemu siku, inipe gelah berejen ama reje mumaafne.
Ama reje….laher kire buah ate jantong rasa ken ules nome tawar ni mata, iwan relengen gere mugegerak, iosah keroe awal tasak, iperen gerale budak. Sawah pitu lo iaran kenduri si lungi lemak, italu sudere orom biak, iboboh gerale si jeroh cacak, buge nge kol mumengen cerak, ini le harapan(harapen) ari kite jema tue, dan wen/ipak buah ate jantong rasani nge irasen gerale “Putra/Peteri” temas kite mutalu.
Sawah kire ketike ijulen kumersah, iserahen ku tengku guru, munontot ilmu oya siturah karna(kena) beta perintah ari agamante. Ike munorot ilmu siperahe ara seba si nge demue tape dele pedi si gere ilenne. Inipe selapes kite ucepen Alhamdulillah, mupestak bang kire kase pejer, mubiner bang kire matani lo, orom-orom kase kite mumerahi eneh si mumatae.
Ari serlo kuroa lo ulenpe mupinah, tonpe nge mugeganti, ari meh kemokotne ike menorot penengonte gere ne patot pesesok sara tapak, gerene layak pejejek sara saka, ringen kiree berberat waros kiree berwajeb, sinte kenaken berluah. Ta kerna detor ni pungi i Kala Serempah kati temol ni serlah i Rejewali, karna toron uren simunemah basah, gumpel ni emon si munaso nami. Muninget kite ken firman ni Allah oya kati turah bang kene sunnah ni nabi. Nge takder kukite heme, bunge irai kera, geh ni budi bang kadang ari basa. Inipe kusi bijak merawe beroleh kata, keta kusi pantas merawe beroleh saka.
Ama reje….pepien ulen sikukodokni ara le asal buah ate jantong rasa ari “Tetunyung/kampong A”, diang-diang bang ku Birah Panyang, panang-panang ku Ujung Baro, tersesino ku parabuang, singah bang matae ku ojong ni lepo. Berakah ijoyah mungenaken uah, teremah kuumah simuruang, sene itelege mungalei bunge tibe kuelem-elemen si mudodok ni tenge. Sene bubak sene telege sene ni kekanak nge sawah ku kite tetue. Ta karna ara manat ari tetue ike muraleki buet turah ari perdue, ike munotong rara turah ari dapore. Katinti bang kase jerilep ni gule iobon ken pelolos ni mangan, cereng ni peng iobon ken penjelas ni utang.
Do’a mutali sempena mutengeren, berlangkah kire sitetuente ari “Tetunyung/kampong (A)” ku ”Bale/kampong (B)”, berdediang berkekede, tercecerak mumerah biak, terkekune mumerah sudere, sesire mumaren amal tedor orom nipi jege, ken penampong ni bade ampel ni kuyu, ken sarat ni kuet orom ken tene yaken.
Nge pien ingi ari one, ike munorot amal tedor orom nipi jege sine, gere sijeroh gere si kotek, singok iperen terhinge-hinge ken uah ni bemen rasa-rasae ipangan iken, beta kata oleh ni tetuente i “Tetunyung/kampong A”.
Ari bulet ni pakat tomong ni peden antara toa kire orom uken, ken kupe gere orom jema, simehate antara kite we orom kite. Berlangkah kire kite, nemah mupakat kire cerite, ike munorot jenojong ni ulu si ageh-agehe, ike tenemeng ni pungu betawe sedemikien, singok iperen ike kebet sara lie ike ruje sara benang, poteh berbilang, ini Alhamdulillah ngele kite bersiwajeben orom reje “Tetunyung/kampong A”. Keta koneng betimang Insya Allah lang ni lo kase orom-orom kite timang.
Ama reje….kire ini we si perlu kusawahen wan acara beguru ni “wen/ipak/anak/kumpu”, buah ate jantong rasani. Selanjote aku atas nama sokot besinte munyerahen wajeb tetah, perlu tentu, ejer marah, manat petenah, ni “wen/ipak/anak/kumpu”, buah ate jantong rasani, ku tenompet ni ama reje….munerimemi kire ama reje. Lebehtu kekase keta gelah beruet, kurange keta gelah betamah.
Wassalamualaikum Wr Wb…..
No comments:
Post a Comment