Melengkan Serah Rempele adat Gayo

Serah Rempele merupakan adat yang dilakukan pada saat pernikahan di suku Gayo dengan menggunakan bahasa Gayo masa lampau, serah rempele diadakan ketika pengantin pria diantar ke rumah pengantin wanita untuk melakukan akad nikah, ada dua kegiatan sebelum melakukan akad pertama adalah serah rempele yang disampaikan oleh kepala kampung/desa dari pengantin pria, kedua menerime rempele, yang sampaikan oleh kepala kampung/desa dari pengantin perempuan. Adapun kata-kata menerime rempele adalah sebagai berikut:  

Assalamualaikum wr wb
Murum urum kite mengucep puji urum syukur ku Allah Ta’ala, si nge munosah rahmat urum kurnie e ku kite, sehingge kite depet murum ibatang ruang tete gergel umah si sara ni. Selawat urum salah gere lupen kite sawahen ku nabinte Muhammad Saw. Asal payah pedi junjungen te berjuang nge mai kite ari arul sihine ku pematang si mulie, salah satu dene i taring ne ku kite membangun rumah ttangga si mulie, insya Allah porami kite saksiken urum urum.

Reje..
Si kami pemuliei reje si mu suket sipet, si timang beret juel murege, daling kolak kin seserenen, kayu rubu ken pelongohen, si remalan termulo murentang tali, si kunul teruken mumutusen peri. Si kedue mien ku imem siperlu sunet si munerime warisen ari nabinte, selanjut e ku petue si musidik sasat si layak laku si wajib tetah siperlu tentu, si kami hormati ku rayat genap mupakat kin alang tunung beret bantu beserta kaum biak sudere si ara wan batang ruang umah sara ni si kami pemuliei.
Tertib bermajelis umet bermelie, antara kite urum kite nge mujurah keranam pirak batil tembege siberbalut ruje siberukir kerawang siberisi belo si tumung gagang, pinang ben wet ari tampuk, kapur putih lagi bersih, asal nge berpilih kacu bunge lawang. 

Reje...
Tekune mubetehe reje mungtu udah beli ari si lalu, apak tu kdang kapur ari si telah sudah, mude tu udah pinang ari si nge-nge, kelat tu udah konyel ari si nge munge, ini pe gere kami seje reje, ampun ku Allah maaf ku tuah bahgie reje. 

Reje..
Ike kite ingeti kin bbudi belangi, lagu nami luh ari mata, ike muninget kite ken buet palis, karang relis gere neh rata. Kami sigehni mutamunen kul beriringen naru, gere tekek gere dele tu menurut tenah ni simutaluara tulu curake. 

1. Gere mehat ken sitetuenikami lebihtu kin taluk idene ike kunule kenake bersere, ike nome segenyur malang,matape sapur penengenenpe asa kurang.

1. Kin simemude mujangkoe kadang munyintak, mujurahe kadang munulak, rayoh tengah porak tengah galak murip i denie.

1. Budak sitengah remalan kujung kuralik bersesangkan, ikoai ke mulewen ike iengoni kemeldi asa kite.

Ken kuson kapit kinine, relem urum engele reje si kin cing urum neraca, kebetape reje perlu tentu turah tetah, salah bertengah benar berpapah, silebih beruet kesikurang bertamah, sisalah bersemah ilit berisi, salam semahku reje ini mulo kami nahen kutuah bahgie ni reje. 

Reje...
Angin le kire berasal, ujen berusul, perbueten nge muasaliah, asalni kuyu ari simang simuk, asal ni uren ari kedute, asalni sedet ari kute merhum, asal ni ukum ari cik serule, umah pitu ruang pemulang pitu perkara ike langit bintang tujuh ike ituyuh kal pitu mata ike iuken telege tujuh ike ipaluh wih pitu kuala, ike ku lut berpawang puket ike ku deret be lancang sira. 

Reje..
Ari sene bubak sene bube, sene ni kekanak nge sawah ku jema tue, enti bang bedosa kite ku tuhen, enti besesalahen kite jema tue, ara bang masyarakat ni kami berdediang berkekede, munentong belang si gere ilen berpancang, mu negon uten si gere ilen betene, i tingok bang ari pematang, tercengang bang ku ujung ni lepo, tersino-sino bang ku batang ruang, tercerak-cerak bang mungenali bbiak bercerite bang mungenali sudere. 

Reje...
Tercerak urum cerite lo si pitu urum ketike si lime, terbilangen si jeroh, urum ketike si bise, ratib tenge mu sara nanguk, nyawa nge mu sara peluk. 

Reje..
Ike kulangit nge le mupucuk bulet, ike ku bumi nge mujantan tegep, ike naru pe tali ara pemuncak, ike narupe cerak sara we metike e, ike taris nume kirimen, rempele nama ujute, ike edete nge beredet, ike ukume nge berkalam, senie bertubuh fiile berupe, ini nama ujute. 

Reje..
Jurah berjamut, talu beresut kuktan murum delah paseh si gere meh-meh ari jantung limpe, i arap ni reje ni ara tulu tepang si kunul atan ni ampang, berules urum upuh kerawang, si kiri ken penumak si kuen ken penupang si lelahe si cengkeh bulang, engon sareh i panang nyata, amat mutubuh pangan murasa, ike kilep gerene muriko, ike mujentik geren mugelo, wan ni silep gerene lupe, ike oya gere ne nume, ini nama ujute munerie mi reje.
Assalamualaikum wr wb.

Sumber: Majelis Adat Gayo Kabupaten Bener Meriah.